कोरोना संक्रमित संख्या घट्यो, शुक्रबार थपिए ११८ जना

२०७७ अषाढ २६, शुक्रबार मा प्रकाशित ५ साल अघि

असार २६, २०७७

चौताराः पछिल्लो २४ घण्टामा १ सय १८ जना संक्रमित थपिएका छन्। देशका विभिन्‍न २५ वटा प्रयोगशालामा गरिएको पिसिआर परीक्षणमा उनीहरूको रिपोर्ट पोजेटिभ आएको हो।

शुक्रबार काठमाडौं उपत्यकामा ४२ जना संक्रमित थपिएका छन्। काठमाडौंमा २८, ललितपुरमा १३ र भक्तपुरमा १ जनामा संक्रमण देखिएको स्वास्थ्य तथा जनसंख्या मन्त्रालयका प्रवक्ता प्राडा. जागेश्वर गौतमले जानकारी दिए।

आजसम्म जम्मा संक्रमितको संख्या १६ हजार ६ सय ४९ पुगेको बताए। शुक्रबार पिसिआर विधिबाट ४ हजार ८ सय ६ जनाको कोरोना परीक्षण भएको छ। आजसम्म २ लाख ७५ हजार ९ सय ५१ जनाको पिसिआर परीक्षण भएको छ।

देशभरका क्वारेन्टाइनमा २३ हजार ९ सय १० जना रहेका छन्। विभिन्न अस्पतालका आइसोलेसनमा ८ हजार ६ सय ३ जना कोरोना संक्रमित उपचाररत रहेका छन्। शुक्रबार १ सय २० जना गरी आजसम्म ८ हजार ११ जना संक्रमित उपचारपछि निको भएर घर फर्किएका छन् ।

बुधबार देशभर २ सय ५५ र हिजो बिहीबार १०८ जना संक्रमित थपिएका थिए। आज शुक्रबार देशभरबाट १ सय २० जनाले कोरोनालाई जितेर संक्रमणमुक्त भएका छन् भने हालसम्म डिस्चार्ज हुनेको संख्या आठ हजार ११ जना छन्।