मन्दिरका खोपाहरुबाट
मुर्ति र तस्विरहरुबाट
यज्ञमा गरिने प्रवचनबाट
निस्केर एकपटक
फेरि आउ कृष्ण !
दुनियाँ कुरुक्षेत्र भैरहेको छ,
आस्थाहरु घाइते भइ लडिरहेका छन्
धृतराष्ट्रहरु……
आँखामा पट्टि लगाइ पतित हुदैछन्
थुप्रैका नियतमा कंसहरु भेटिन्छन्।
सकुनीहरुले पासा फालिरहेछन,
द्रौपदीहरुको चिर हरण भैरहेको छ
युधिष्ठिरहरुको शिर निहुरिरहेको छ,
अर्जुनहरुको बाणको तिर भाँचिएको छ,
फेरि आउ कृष्ण
दुनियाँ बचाउ , फेरि आउ
तिमी बाँसुरी बजाउदै नबस,
गोपिनी भुलाउदै नबस्,
यहाँ गोबर्धन पर्वत होइन ,
अझ उचाइमा,
सगरमाथा उचाल्नु परेको छ
शान्ति,समृद्धि स्थापित गर्नुपरेको छ,
युवाहरुमा राष्ट्रभक्ति जगाउनु परेको छ।
धृतराष्ट्रका आँखा सल्यकृया गर्नुपरेको छ,
गोपिनीहरुलाइ साक्षर बनाउनुपरेको छ।
द्रौपदीहरुलाइ काली,भद्रकाली बनाउनु परेको छ !
फेरि आउ कृष्ण,
मन्दिरका खोपाहरुबाट
प्रतिमा र प्रतिबिम्बहरुबाट
निस्केर
फेरि आउ कृष्ण !!
खबरज्योति डट कमका लागि
प्रवन्ध निर्देशक : विदुर गिरी
प्रधान सम्पादक : युवराज गिरी
प्रतिक्रिया दिनुहोस